Big Congratulation pasaltha salai Tial Hram Ling… Bawipa nih a nuam mi, aa daw mi chungkhar si zungzal ding in thluachuah inpe ko hna seh, kan in lawmhpi tuk cio eee…
Mizoram Ah Manipur(Kuki-Chin) Ralzaam 12,000 Leng An Phan Cang– India ram, Manipur ramkulh i Kuki-Chin le Meitei miphun kar buainak ruangah Kuki-Chin miphun chungin minung 12,629 cu August 7 tiang ah Mizoram an phan cang, tiah August 7 ah Mizoram nawlngeitu nih an thanh. Manipur ramkulh in a zaammi Kuki-Chin tam deuh cu Kolasib pengkomh le Aizawl pengkomh ah an um hna. Kolasib pengkomh ah hin minung 4,443 an um i Aizawl pengkomh ah minung 4,272 an um, tiah nawlngeitu nih an langhter. Ramkulh cozah cazin ningin ralzaam camp 38 ah ralzaam 2,780 an um. A dang ralzaam 9,849 hi inn hlang i a ummi an si, tiah theih a si. Kuki-Chin le Meitei miphun kar buainak hi May 3, 2023 in aa thawk i, thla thum hnu zongah buainak a dai taktak kho rih lo. Naitan zarh zong ah minung 6 nunnak a liam ṭhan, tiah theih a si. Myanmar ram in Mizoram i a zaammi hna ca ah ralzaam camp 160 an sak i ralzaam 35,000 hrawng an um lio. Cu pinah Bangladesh in ralzaam 700 leng an um ve, tiah theih a si.
Kalaymyo Thonginn Ah CNDF Ralkap Pakhat Nunnak A Liam! Sagaing ramṭhen, Kalaymyo thonginn ah thong a tla mi Chin National Defense Force-CNDF chungtel Salai Van Biak Him cu Kalaymyo siizungpi ah thlop cuahmah a si nain August 6, zinglei suimilam 10:00 hrawngah a nunnak a liam, tiah tualchung mi nih an chim.Salai Van Biak Him cu a luancia 2022, March 15 ni Kalaymyo thonginn chung i kahnak a chuahlio ah a nunnak liammi CNDF chungtel Van Dim he 2021, May 30 ah SAC ralkap nih sualpuhnak he an rak tlaih hna.”Keimah he Kalaymyo thonginn ah kan rak umṭi bal. Salai Van Biak Him hi Van Dim he hmunkhat teah a umṭi pengmi an si i, Van Dim a thih hnu ah hruaitu a si an ti ruangah fak tuk in hrem a tong. Cu pinah a nih hi a ngandam lo ngai mi a si i, a cuap zong a ṭhat lo caah siizung ah an thlop lengmang mi a si,” tiah Salai Van Biak Ham he hmunkhat ah thong a rak tla ṭi bal mi pakhat nih a chim.
CNDF ralkap Salai Van Biak Him hi a ngandamnak a ṭhat lo pinah sii-ai tlamtling in thlop a si lo, ṭha tein siizung ah i thlopnak nawl zong a ngei lo. A zual tuk hnu lawngah thonginn leng siizung ah an kalpi, tiah an chim. Salai Van Biak Him thihnak kong he pehtlai in CNDF chimphuannak nawlngeitu Salai Cung Ngai nih cun, “Anih hi lungzawtnak a ngeimi a si tiin kan theih. Siizung an phanhpi hnu minutes 30 hrawng a rauh ah a nunnak liam, tiah an chim nain, a zoh dawhnak in siizung i a thi mi bantuk in an chim a si ko. Thonginn chungah ṭha tein an thlop lo ruangah atu bantuk in a nunnak tiang a liam hi a si. A ruak zong a chuah semnak Chin ramkulh Falam ah vui ding in hal a si nain an sianh hna lo caah Kalaymyo ah nihin ah ruak vuinak an tuah,” tiah a chim. Atu tiangah CNO/CNDF chungtel 14 cu SAC ralkap nih phungning loin an tlaih hna. 2022, March 15 Kalaymyo thonginn chung i kahnak a chuah lio ah Salai Van Dim cu a nunnak a rak liam i, tutan ah nunnak luammi Salai Van Biak Him hi thonginn chung i nunnak a liam mi pahnihnak a si. TCP