Chin Miphun- Kanmah te hmanh in Chin Miphun iti tawk kan rak ihngal lo i Mirang nih hi hna hi miphun pakhat an si ko tiah phunghram pakhat an rak ser i miphun pakhat uk in an rak kan uk. Cu ceo cun Chin miphun kan iti. Ca le holh zong i dang ceoco in. Nunphung zong ikhahnak zaazat idannak zaazat.Biaknak kan ti khuahrum khuavang biaknak in Khrihfa ah Mirang theo nih an kan thlen i cu zong cu zei ngai hlei hlah leng parpavuan fang a simi kan hei tamning. Bu kan ithen dih hoi kanmah le kanmah kan isoi kan idoh nak ah Mission rian ngai zong tuan kho hlah.
Nation building timi Miphun sernak ah Kawl te cu AD 1000 lio hrawng khan Siangpahrang uknak in an i uk cang. Cu hlan ah Mon le Rakhine te hna khi Siangpahrang uknak in an rak i uk cang. Cucaah holh, nunphung, biaknak tibantuk ah ithencheunak an ngei tuk lo. Kannih cu khuabawi ram ukbawi ti tuktak tiang fang lawng kan rak phan i miphun iti awk hmanh kan rak tlak lo.Ral lei ah Mirang an phan i a pikpak in mah le khua pengtlang cio hrawnghrang in ral kan rak tho. Kan tei hna maw?1962 in ral kan tho kan ti kanmah le kanmah lila kan ileirawi i kan pule tampi an rak thi.1988 in mino cathiam ral an tho hoi. Kanmah ram chung lila ah khuabawi nih leirawi ruangah tlaih a tongmi le kah a tong CNA ralkap tampi an rak um.
Cucun 2021 ah ral thawhnolh a si hoi. Tutan cu Kawl zong an tho ve cang voidang he kan ilo tilo kan caan ttha bik a si tutan i kan tei lo ahcun a si kho tilo tei tiang kan doh lai tiah bia cu kan chim nain kan tuahmi taktak zoh tikah mah le pengtlang ven, mah pumpak minthannak le hlawknak kawl fang…A thawngmi Miphun ralkap (National Army) kan ser lai ti cu kan duh cio hoi lo. Mino pawl ruat hmanh uh nan nulepa nih Miphun caah a herhning tluk in an rak i pek Ngam/Khawh lo ruangah dahkaw nihin ah na nolio caanttha vialte ramtang ah na hman hih! Nangmah zong biatak tein naa pek tung lo i miphun himnak rian hi tlangrian thawh in naa thawh ahcun na tefa nih nangmah nak in an vun tuar deuh te lai hih!
Hiti te kan kal ko ahhin cun kei ka chan ahcun Chinland Zalonnak hmuh ding cu kaa ruahchan ngam bak lo.
Dingrep a ngei lomi, nawl a ngai lomi, cawnnak ttha te a ngei lomi ralkap nih ral an tei bal lo. Nihin Chinland kan ngeihmi hna ralkap tam deuh cu Volunteer pei kan si cu. Volunteer ahcun un zong a tam i uah zong aa tel tiah ka uu pa nih a rak ti bal. A dik tuk. Ralkap ahcun un a ngah lo uah a ngah lo. Thihnak ding lam a si hmanh ah commander nih kal a ti ahcun a kal ding a si. Cucu ralkap phung a si. Cu tiang kan ngamh lo kan huam lo ahcun ralkap kan tuan lo lawlaw a tha. Tu ral kan tukning hin cun kum 100 zongah kan tei lai lo! salai vakok