NLD Central Committee nih Henry Van Thio cu NLD Party Chungtel Sinak In An Phuah — National League for Democracy (NLD) Central nih Henry Van Thio cu NLD party chungtel sinak in an phuah cang tiah August 9 ah cathanh an chuah. NLD Central Committee lei cathanh an chuah mi cu-
1.Rammi sin ah kutthlak in sualnak a tuahtu SAC ralhrang Min Aung Hlaing nih uknak a lak hnu ah NLD party Chairman le Vice Chairman telh in center chungtel minunh 9 cu tlaih in thong a thlak hna. NLD Central chungtel pakhat a si mi U Nyan Win cu thonginn chung ah ngamdam lo in a um i sii lei zohkhenh- thlopbulnak tha tein a hmuh khawh lo ruang ah thonginn chung ah a nunnak a liam. NLD party cu ramchung mipi nih an duh mi Democracy hmuhnak ding ah mipi he kutsih in hmainor mi a si.
U Henry Van Thio cu (2016-2021) hluttaw palai rian a ṭuan chung ah party nih zumh mi a si caah Myanmar ram Vice- President dirhmun tiang rian pek a si nain nihin ah mipi a hremtu, a thattu, tlaihkihnak a tuahtu misual ralhrang bu he tonpumhnak cu (31.07. 2023) ni ah SAC ralhrang he komh in rian a ṭuan mi hmuh a si.A cunglei rianṭuannak kong he pehtlai in (8.8. 2023) ah a voihnihnak Central Committee caan karlak emergency meeting auh in Central Committee biaceihnak ah U Henry Van Thio cu NLD party chungtel sinak in chuah ding in biakhiahnak a ngei.
Cucaah U Henry Van Thio cu mipi duhnak tlinter ding le party nih aa timh mi policy zulh in ṭuan ding in biakamnak a tuah i, 2020 kum ramchung thimnak ah Amyotha hluttaw palai in teinak a hmu i, mipi duhning tein rianṭuan ding le biakamnak a tuah mi cu a zulh ti lo caah U Henry Van Thio cu National League for Democracy party chungtel sinak in chuah a si cang. 08.08. 2023 ni a voi 2nak Central Committee Caan karlak meeting hnatlaknak he, Central committee National League for Democracy. Thechinlandpost
A Thar In Remhmi SAC Ukhruainak Council Ah Dr. Hmuh Thang Aa Tel- SAC nih ukhruainak council an remh tharmi ah Chin ramkulh USDP Chairman Dr. Hmuh Thang aa tel, tiah August 2 ah SAC nih an thanh. Dr. Hmuh Thang cu a 2023 February 18 ah SAC ukhruainak council chungtel ah a rak i tel cangmi a si.SAC nih ukhruainak council an remh tharmi ah Min Aung Hlaing cu Chairman ah an thim i Vice Chairman ah SAC ralkap ralbawizik chang Soe Win a si. Secretary ah Deputy General Aung Lin Dwe le Assistant Secretary ah Deputy General Ye Win Oo hna an si, tiah theih a si.
SAC ukhruainak council chungtel ah General Mya Htun Oo, General Tin Aung San, Deputy General Moe Myint Htun, Deputy General Soe Htuat, Deputy General Yar Pyi, Wana Maung Lwin, Dr. Hmuh Thang, Shwe Kying le Yan Kyaw hna an si, tiah SAC nih cun an langhter. Dr. Hmuh Thang cu USDP in 1990, 2010, 2015 le 2020 kum thimnak ah a rak i zuam i, 1990 kum le 2015 kum ah Chin ramkulh Hluttaw palai in teinak a rak hmutu a si. Thechinpost
Note- Zeitihlei lungfahnak biachim ding kan thei kho ti lo, a poituk ti hlei cun mu… A kan thah cuahmah i a kan khangh cuahmahtu Min Aung Hlaing riantuannak thazaang a pemi cu zeitindah mipi thinlung le miphun thinlung ah sualphawt loin an um khawh lai… Lainawng mipi thazaang petu le amah rian bawmtu an si caah anmah zong Lainawng case, inn le lo khangtu sinak case an i orh ve hau ko. Ralhrang pa MAH he i bawm in riantuan a ngamh mi cu CDF cathanh ning in zeipoh an ing an tuar ngam ve tinak asi.