Thantlang ralhrang sakhan cu kan ralkap CNA thithruainak in CDF-Zophei le CDF-Thantlang nih an nam hna. Kahdohnak hi a fak ngaingai, ralhrang nih raltuknak vanlawng tam taktak in an kah hna nain Bawipa nih kan ralkap a dirpi hna caah Thantlang ralhrang sakhan cu an lak khawh. Hi kongah naihniam pakhat nih thil sining cu hihi thin a langhter, “Nihin ikahnak ah Ralhrang 18 an thah hna RPG 2 le MA 3 an lak. Kuan tamlak le bomb tanlak an lak khawh. A nungin 2 an tlaih hna” tiah achim.
Nihin August 14 Kahdohnak Ah Chin Ralkap Pali Nih Ram Le Miphun Ca Ah Nun An Pek! Chin ramkulh, Thantlang um Khah Mah Yah 269 SAC ralkap hmunpi cu nihin August 14 zing suimilam 5:00 hrawng in CNA, CDF-Thantlang le CDF- Zophei nih an va kah i SAC ralkap hmunpi, Company sakhan cu Chin hriamtlai phu nih kan laak khawh, tiah CNF/A nih an thanh.Kahdohnak ah SAC ralkap a thimi zat cu fiang in theih a si lo nain Chin ralkap nih SAC ralkap 2 an tlaih hna i meithal zun 6 an laak. CDF- Thantlang in Salai Cung Hmun Thu, CDF-Zophei in Salai Lai Hnin, Salai Ṭial Cung Bik le Salai Tin Peng Lian nih ram le miphun ca ah an nunnak an pek, tiah theih a si.
SAC Ralkap Nih Hriamngan Kah Ruangah Loklung Khua Inn Thum A Rawk- Chin ramkulh, Hakha khuapi um SAC ralkap nih hriamngan duh poh in an kah ruangah Loklung khua inn thum a rawk i, tualchung mi pakhat hliam a tuar, tiah theih a si. “Zahan August 13 zan suimilam 11:00 hrawngah SAC ralkap nih Hakha peng, Loklung khua cu hriamngan in an kah. Hriamngan kahnak in inn 3 a rawh pinah tualchung mi pakhat zong a lu ah hliamhma a pu,” tiah min langhter a duh lomi pakhat nih The Chin Post ah a chim.A ruang um loin SAC ralkap nih hriamngan an kahmi hi cihmih an kan timh caah a si. Sualnak ngei lo tualchung mi umnak ah hriamngan an kahmi a tlawm ti lo. Naite zong ah Falam peng Ramthlo le Sunthla khua ah Fighter le hriamngan in an kah cang. Fihnung tukmi sualnak a tuahtu ralkap hna hi zeitik hmanh ah kan ngaithiam kho hna lai lo, tiah a chim chap.
“A luancia ni tlawmpal ah palik sakhan in palik pakhat le rungtlang um SAC ralkap pakhat cu CDM kan tuah lai tiin an chuak i Loklung khua ah an kal. Cu hnuah CDM tuah loin an kir ṭhan hnu, zahan August 13 zan suimilam 11:00 hrawngah SAC ralkap nih hriamngan in voithum tiang Loklung khua cu an kah,” tiah tualchung mi pakhat nih The Chin Post ah a chim ve.SAC ralkap nih hriamngan an kah ruangah a rawkmi Loklung khua inn thum cu khuami hna nih an zuanhnawh hna i nihin August 14 ah an remhpiak ṭhan hna, tiah theih a si.SAC ralkap nih Loklung khua hriamngan kahnak kong he pehtlai in SAC ralkap nih thanhnak zeihmanh an tuah lo bantukin CDF-Hakha nih thanhnak an tuahmi a um rih lo, tiah theih a si. TCP