PSG star Meymar cu Saudi club minthang a simi Al-Hilal ah I thial dingin hnatlaknak a tuah cang tiah theih asi. Al-Hilal nih hin Neymar hi kumkhat ah £130 million a pek lai I kum hnih caah asi lai. Cu pinah zuamnak puai ah Al-Hilal nih teinak a hmuh poh ahcun £ 70000 bonus pek asi rih lai. Cu lawng hlah Al-Hilal hi vawlei pi nih an theih chin lengmang khawhnak dingah Neymar nih a Instagram ah Saudi Arabia cu a post peng lai I £430,000 a hlawh peng fawn lai tiah report nih a langhter.
Kalay Peng Thasi Khua Mi A Thong Reng Lo Cu A Himnak Hmun Ah An Zaam. Sagaing ramṭhen, Kalay peng thlanglei ah SAC ralkap le tualchung hriamtlai phu kar nihin August 15, zinglei in kahdohnak a chuah ruangah Thasi khua mi hna cu a himnak hmun ah an zaam hna, tiah tualchung mi nih an chim.Kalaymyo khuachung ummi SAC ralkap thazaang 200 hrawng cu tuzinglei ah Kalay peng thlanglei ah rallam an sial. Rallam a sialtu SAC ralkap le tualchung hriamtlai phu hna cu Thasi khua pawng ah an i kap i, tualchung mi hna cu a himnak hmun ah kan zaam, tiah ralhrial dirhmun a phan ve mi pakhat nih a chim.
“SAC ralkap hna cu Thasi khua an phanh hlan ah hmundang um ralkap nih hriamngan in lam an sialpiak hna caah khuami cu kan dihlak ngawt in kan zaam, a tli zaam kho lo mi zeimawzat an um,” tiah a chimchap. SAC ralkap thazaang 200 hrawng nih tang lei in rallam an sial pinah raltuknak vanlawng in kahdohnak ah an bawmh hna, tiah tualchung mi nih an chim. Kahdohnak chung ah aa hliam mi le nunnak a liam mi kong fiang tein theih a si rih lo. Kalaymyo khuachung um SAC ralkap nih hriamngan in kah an bawmh hna, tiah tualchung mi nih an chim. TCP