CNDF chuak hna seh timi statement hmuh cu lung a nuam lo ngaingai. Zeiruang ah dah Global Satawm nih CNDF cu Satawm ramchung in chuak dih u tiah an ti hna ti ahcun, Satawm khuami Sia pahnih thah mi ruangah a si. Aug.18 zan ah Satawm khua pawng ah bomb a puak I ralhrang hlah maw an si tiah CNDF nih cun heh tiah meithal an puah ve.Media lei nih kan hmuh ning lebang ahcun CNDF le SAC ralhrang an I kap tiah ti asi ko. Thil sining vun ngiat hlathlai deuh tikah CNDF le SAC kahdohnak thawngpang si loin CNDF nih a kamh mi bomb cu saram zute vate pakhatkhat nih a cil sual ruangah a puak mi asi.
Cuhlan zongah ramlak zu va nih an puahter theo lengmang ton. Bomb puak nih Satawm khua zuat SIA pahnih an thi. Mah a thimi Sia cu CNDF nih khuami thawngtheihternak um loin a thli tein an can I an umnak lei ah an thiar hna. Pakhat cu a dihlak in a sa vialte an thiar dih cang nain a dang pakhat tu hi cu an tong manh rih lo tiah an ti. Hibantuk in a thli tein kan zuat satil an phiar/fir lengmang mi hi kan duh hrimhrim lo. Cu caah CNDF nih Satawm kan ramchung ah an kamh mi Bomb vialte cu sut dih than hna sehlaw, Satawm ramchung in chuak dih ding in kan in nawl hna. Hi thawngtheihternak hi nan zulh lo ahcun Global Satawm minin a si khawh chung in hmalaknak kan kalpi thluahmah lai ti hi Hualngoram Peoples Organization le CDF Hualngoram nih kan theih pi u tiah kan in nawl hna tiin cathanh an chuah.
