Tuluk Gap Pipeline Kalnak A Hngak Mi SAC Ralkap Sakhaan CDF-Asho Nih An Kah — Magway ramthen, Minbu pengkomh, Ngaphe peng chungum Tuluk gas pipeline kalnak ah lampi a hngak mi sakhaan kahdohnak ah SAC bawino telh in ralkap 2 an thi tiah CDF-Asho nih an chim tiah Mizzimma Daily thawngzamhnak nih a langhter. Minbu-Ann lampi-Ngaphe peng Maylatt khuapawng um Tuluk gas pipeline lam kalnak a hngak mi SAC sakhaan cu CDF-Asho nih August 20 zing 5:30am ah an va kah. “Kahdohnak ah ralhrang an hriamnam lak ding in timhtuahnak a um nain kuan/zen ruang ah la kho ti lo in hnu kan kir, SAC lei in bawino pakhat le ralkap 1 an thi” tiah CDF-Asho nih an chim chap.
Mah Gas line le Zinan pipe line hi Rakhaing ramkulh Kyaukphyu peng in Rakhine ram, Shan ram, Magway ram, Mandalay, ram vialte cul in Tuluk ram Yunam tiang a kal mi pipe line a si.Tuluk ram nih SAC ralhrang bawmhnak pe ti lo ding in Myanmar mipi nih an au hnawh lengmang hna, mah caah Tuluk pipeline a kalnak lam hngaktu SAC ralkap cu an kah pah lengmang ve hna. 2023 May 7 ni zaan 8:30pm ah Mandalay ramthen, Myingyan pengkomh Natogyi peng chung ah Tuluk gas pine line a hngaktu SAC ralkap cu Natogyi Guerrila Force (NGF) nih an rak kah bal. Thechinlandpost
Mindat-Kyaukhtu Lam Hman Rih Lo Dingin CDF-Mindat Nih An Thanh, SAC ralkap rallam an sial i an cawlcangh caah Mindat-Kyaukhtu lam cu nihin August 22 thawk in ahohmanh kal rih lo ding le hman rih lo dingin CDF-Mindat nih an thanh. Nizan August 21 zan ah Mindat khuapi ah kahdohnak a chuak i nihin August 22 zinglei zong ah Saw peng Kyaukhtu khuapi lei ah SAC ralkap an cawlcang, tiah tualchung mi hna nih an chim.
Nihin zinglei ah Kyaukhtu in a chuakmi SAC ralkap pawl cu Saw peng Yeyin khua pawng ah cheukhat cu an phan i cheukhat cu lei hmun in an ṭum i Yaw khua lei hoih ah an kal, tiah tualchung mi pakhat nih cun a chim. SAC ralkap pawl cu Chaungku khua pawng um Chaungpyi ah ralkap 15 hrawng, Myopauk le Yeyin khua karah ralkap 30 hrawng le Myopauk khua chung ah ralkap 20 hrawng an um. SAC ralkap pawl cu sei an i bei lo caah mizapi ralring tein um dingin Yaw Alintan nih a langhter.TCP