Nu Pakhat Telh In Indaw Khuapi Ah Minung Pali Cu SAC Nih Thih Dan An Pek Hna.August 18 ah Sagaing ramṭhen chaklei Indaw peng ah tlaih a tongmi minung 4 cu Indaw peng SAC biaceihzung nih thih dan an pek hna, tiah theih a si.Thih dan an pek mi hna hi Monywa-Myintgyina khualtlawng mi phortu motorkhal Zaw Myo Htun, Hticheik peng in Kyaw Suar Win le Myint Myint Aye an si i, Indaw peng in Aung Kyaw Kyaw Moe an si, tiah theih a si.
Zaw Myo Htun hi a luancia April thla ah motor a khalhnak Indaw chek gate ah tlaih a rak tong. Aye Aye hi June thla ah Indaw khua chung ah tlaih a rak tong ve. Aung Kyaw Kyaw zong June thla ah tlaih a rak tong ve. Tlaih a tongmi minung pali hna hi SAC nih ralhrang dohnak upadi 49(a), 52(a) in August 18 ah thih dan an rak pek hna, tiah theih a si.Indaw peng ah nifatin ti awk in tlaihkhihnak a chuak i thih hlan lo thongthlak dingin bia an khiahpiak mi hna zong an um. Indaw khuapi ah chekhlatnak a tam i phone chung hmanthlak le SMS zong ralkap nih an chek dih, tiah theih a si.
Mindat Ah Siizung, Sianginn Le Zungkip Cu SAC Ralkap Nih An Phihter Hna. Chin ramkulh, Mindat ah SAC ralkap nih August 22 thawk in SAC kuttang um zungkip, siizung le sianginn hna cu an kharter hna tiah tualchung mi nih an chim. Cu hlan ah cun Mindat khuachung ah a ruang um loin zungkip kharter a rak um bal lo. Kahdohnak a chuah caan ah caan zeimawzat an kharter tawn hna nain tutan ah cun a ruang um loin an kharter hna, tiah theih a si. “SAC ralkap pawl zong an umnak sakhan in leng ah an chuak bal lo i, khuachung um siizung le sianginn telh in zungkip an kharter hna. Zeiruangah atu bantuk an tuah hi a ruah awk kan hngal lo,” tiah tualchung mi pakhat nih a chim.
Mindat khuachung ah ralvennak a tuahtu SAC ralkap motor cu a luancia July 30 ah Chin ralkap le pah kah phah nih an rak kah hna caah, Mindat khuachung ah a min chia ngaimi pengkomh palik bawi Aung Myat Thu cu fak ngai in hliamhma a rak tuar i Mindat siizung ah an thlop cuahmah, tiah theih a si.Mindat-Yaw ramri ah SAC ralkap nih vanlawng in kherhhlainak voi tampi an tuah, Kyaukhtu in Yaw lei zong ah SAC ralkap nih rallam an sial, tiah CDF-Mindat sin in theih a si.