Wanbao Company Ah Rianṭuan Dingin A Kalmi Pyituhsit 14 Cu PDF Nih An Tlaih Hna. Sagaing ramṭhen, Salingyi peng, Wanbao Copper Project ah rianṭuan dingin Ayeyarwaddy ramṭhen in a kalmi pyituhsit 14 cu kan tlaih hna, tiah Chindwin Galon Yarza Defense Force(CGYDF) nih nihin August 25 ah an thanh. August 24 zing suimilam 11:00 hrawngah Ayeyarwaddy ramṭhen, Tharpaung peng, nitlak thlanglei, ramṭhen SAC ralkap headquarter in training a dihmi pyituhsit hna cu Salingyi peng hmun pakhat ah PDF nih chekhlatnak an tuah hna i Alpha Column Company 1, Alpha Special Force le Company 3, Chindwin Galone Yarzar Guerrilla Defense Force nih an tlaih hna, tiah theih a si.
Tlaih a tongmi pyituhsit nih cun, Salingyi peng um SAC ralkap he rian a ṭuanṭi mi Wanbao Copper Project ah rianṭuan dingin kan kal, tiah an chim. Pyituhsit pawl cu peng mizapi ukhruainak phu sin ah kan chiah hna, tiah CGYDF in ṭuanvo ngeitu nih a chim.
Wanbao Company nih tualchung mi hna vawlei cu SAC ralkap he i bawm in an kulh dih i a ruang um loin an chuh dih hna. SAC ralkap nih rallam an sial caan zong ah an umṭhutnak tiang in an zohkhenh rih hna, tiah CGYDF nih cun an langhter. Cu pinah rallam a sialmi SAC ralkap nih pawngkam khuate ah hriamngan an kah i khuami hna zong an tlaih hna. Atu le atu an hrem hna, tiah theih a si. August 10 tiang Salingyi peng mizapi ukhruainak phu nih an langhter ning ah Wanbao Company in a chuakmi SAC ralkap nih khuate 13 an khangh i inn 444 a ciam, tualchung mi 17 thah an tong, tiah theih a si.