SAC Palik Nih Hakha Khua Chung Ah Pa Pakhat An Tlaih! Chin ramkulh, khuapi Hakha Dawrthar sang ah SAC kuttang palik pawl nih pa pakhat an tlaih, tiah tualchung mi hna sinin theih a si. August 28 zing suimilam 9:30 hrawngah palik pawl cu Auto zung pawng le Betheny sang lei kalnak pawng hrawng ah an um i mi an bawh hna. Midang aa chawklet mi hna cu chekhlatnak an tuah hna lo nain pa pakhat belte cu an tlaih i, motor chung ah an luhpi i an kalpi colh, tiah min langhter a duh lomi pakhat nih The Chin Post ah a chim.
“Auto zung pawng le Betheny sang lei kainak pawng hrawng ah hin palik pawl an um tawn. Civil motor in an ra i mi an bawh tawn hna. August 28 zing suimilam 9:30 hrawng zong ah pa pakhat cu an dirter i a phone an zohpiak hnu ah an tlaih i motor cung ah an kaipi. Palik pakhat nih motor chung zong ah an tlaihmi pa phone cu a zokpiak len,” tiah a chim chap.
A dang mi pakhat nih, “Palik pawl an kal-um ning zok tik ah hin mi va bawh hna sehlaw a lo. Mi chawkvai dang hna tu cu an dirter hna lo pinah chekhlatnak an tuah hna lo. An tlaihmi pa belte hi an rak ngiat cangmi maw a si ti cu ka hngal lo. A phone an chuh dih in an kalpi colh ko,” tiah The Chin Post ah a chim ve. Hakha khua chung ah SAC ralkap le palik pawl cu mi sawhsawh bantuk tein an i umter i mi chawkvai cu chekhlatnak an tuah tawn hna. Zarhpi ni zanlei sang ah hin mi an chek khun i, pa mino deuh cu CDF nan si maw tiin an hal hna pinah an hro tawn hna, tiah tualchung mi hna sinin theih a si.TCP