SAC Le NCA Minthu Hriamtlai Phu 5 Cu Naypyidaw Ah Tonnak An Ngei. SAC remdaihnak phu le rampumpi kahdaih hnatlaknak minthu-tu(NCA) hriamtlai phu 5 cu nizan August 29 ah Naypyidaw ah tonnak an ngei, tiah theih a si. Cu tonnak ah cun Arakan Liberation Party(ALP), Democratic Karen Buddhist Army(DKBA), (KNU/KNLA-PC), Lahu Democratic Union(LDU) le Pa-o National Liberation Organization/Army(PNLO) phu hna an kai, tiah theih a si.
Cu tonnak ah cun SAC ralkap nih an sermi 2008 phunghrampi remh an duhnak section hna le thimnak(election) kong hna zong ceihmainak an ngei i nihin August 30 ah a voihnihnak tonnak an ngei ṭhan. Atutan tonbiaruahnak ah NCA minthu ve mi Restoration Council Of Shan State/Shan State Army(RCSS/SSA) le New Mon State Party(NMSP) an kai hmuh an si lo. Rampi kahdaih hnatlaknak NCA min a rak thumi hna hi KNU, (RCSS/ SSA), NMSP, All Burma Students’ Democratic Front(ABSDF), ALP, CNF, DKBA, KNU/KNLA(PC), PNLO le LDU hna an si. SAC nih nawlngeihnak an laak hnu 2021 in KNU, CNF le ABSDF hna cu SAC ralkap nih NCA minthut cahren vialte an buar dih an ti caah NCA lam zul ti loin SAC an doh hna. TCP