Thantlang kahdohnak ah CNA,CDF pasaltha 15 an nunnak a liam. Minung 15 chungah CDF-Zophei in minung 5 an si. Nunnak a liammi hna kongah CDF Zophei nih hitihin ngaihchiat pinak an langhter, “CDF-Zophei Battalion 1 in Lieutenant Salai Bawi Cin Mang(kum 24), Salai Bawi Dawt Peng(kum 20), Salai Duh Tling Lian(kum 18), Salai Thawng Za Thang(kum 21) le Salai Van Za Mang(kum 25) cu 2023 August 28 Thantlang operation ah ralhrang an dohnak ah ram le miphun ca ah an nunnak an pek.
Kan ralkap nih ram le miphun caah nunnak thap in an pekchanhnak cung ah upatnak sangbik kan pek hna. Kaltak mi chungkhar le hawikom vialte nan ngaihchiatnak kan in hrawmpi hna. An thisen le an nunnak a liammi cu kan ram le miphun luatnak caah si hram ko seh,” tiah an ti.
ZRA Le SAC Ralkap Phufonh Nih CDF Tonzang Battalion 3 Sakhan An Laak! Chin ramkulh, Tonzang peng, CDF-Tonzang battalion 3 sakhan cu ZRA le SAC ralkap nih nizaan August 31, zaanlei suimilam 3:30 hrawng ah luhhnawh in an laak, tiah CDF Tonzang battalion 3 commander sin in theih a si. CDF Tonzang battalion 3 in commander Zo Mu Mung nih cun, “A voi thumnak training dih caan hmannak kan tuah a thaizing ah Tonzaang sakhan kahding in timhtuahnak kan ngei, kanmah vanchiatnak ah kanmah lei ralkap pakhat cu zu a ding i a zaam.
Cu kong cu SAC ralkap nih an theih i zaanlei suimilam 3:30 hrawng ah an kan luhhnawh,” tiah a chim. Kahdohnak ah CDF Tonzang battalion 3 lei in nunnak liam le hliamhma tuar an um lo nain sakhan chung chiahmi thilri vialte an sung dih, tiah theih a si. CDF Tonzang battalion 3 sakhan chung ah meithal 7, drone 2, RPG 1, 60mm 1, 40mm 1, AK kuan zuun 1000 leng, cycle 7 le facang tun 20 cu ZRA le SAC ralkap nih an laak tiah theih a si. TCP