US vice President Kamala Harris nih Biden kongah a timi cu, Biden nih hin ngandamlonak ruangah maw, kum khua upat tuk cang ruangah maw president rian pehzulh in a tuan khawh lo ahcun arian chawn ding in ready ka sip eng ko tiah achim. Kan theih bantuk in Biden hi kum 80 tar a si cang, November in 81 a tling cang lai. President hi I cuh than sehlaw a kumkhua upa taktak cang hnga.
Atu tiangah Biden nih zeimaw tete ngandamlonak a nei pah ngai cang tiah theih asi. Mipi hmai ah um kal cawlcangh zong aa harh cang. 2024 ah president kaa cuh than lai tiah phungning tein thanhnak a tuah. Cu kongah AP/NORC poll nih a langhter ning ahcun Americans mipi 77% nih Biden hi president caah an duh ti lo I, a party Demos chung in 69% Biden president aa cuh than ding cu an duh ti lo tiah alanghter.
Lungchuak Bia- Laimi Chungin Israel Hrinsor/Cithlah Kan Si Timi Kong– Mizoram sianginn ka rak kai lio tang 8,9,10 ah khin Mizo Nunhlui (Mizo History) timi kan rak cawng. Cu cauk ahcun Mizo pipu an rak ithawhkehnak, zeitindah Mizoram ah an rak phanh timi pawl tampi tial mi a rak um. Mizo pipu tuanbia chungah Isreal hrinsor/cithlah kan si timi pakhat hmanh Mizo Nunhlui cauk ah aa tial mi ka hmu lo.
Chin miphun tuanbia a kan tial piaktu hna abik in Dr.Lianhmung Sakhong cauk zong ah Chin miphun hi Israel hrinsor/cithlah kan si timi a langhter mi ka hmu lo (ka palh sual hnga dek maw). Chin miphun/Mizo pipu thawhkehnak ratnak hi lamhlat pi Middle East region leiin si loin lam nai pawngkam Tibetan lei kap in thlangtla mi kan si deuhnak cu History nih tam deuh pi in a langhter. Cu bantuk tuanbia fim cawnnak sianginn tiang zong ah miphun pakhat asi mi nih tha tein cawn asi ko mi kha, Cheukhat Mizoram mipi chung in tlampalte le Laitlang chungin tlawmpalte asimi hna nih kan nih cu Israel hrinsor/cithlah kan si tiah an ti i Biaknak Bu an dirh i Christmas Kumthar hmang duh loin Judah miphun thihnak in an rak luat lunglawmhnak puai PURIM cu sunglawi taktak in an tuah mi hna ruah ah khin ka khuaruah a har ngai.
Cheukhat Mizo cu Israel hrinsor, cithlah kan si an ti i Israel ah a kal mi an um taktak. Cu hna cu Israel ah Jews biaknak ah an um dih hna tiah an ti (adik le dik lo cu ka thei lo). Zeiruangah dah Mizoram le Lairam ah Israel hrinsor/cithlah kan si tiah aa timi hna khi Jews bu tiin an i ti lawlaw ko hnga lo ti hna ka ruat cuh. Jews cu kan theih bantuk in Biakam Hlun cauk a zummi an si. Jesuh Khrih cu Messiah asi ti a zum kho bak lomi an si hna. Israel ramchung Jews miphun Judaism biaknak nih Jesuh Messiah an zum bak lo nain Mizoram le Lairam Israel cithlah hrinsor aa timi nih an zumh fon. Israel an phanh tikah Jesuh Messiah a zum kho bak lomi bu ah an um than hoi. AN I LAKLAWH NGAI LAI