Laimi nih zeiruangdah ar-inn kan cawk? US um Laimi lak i a van laar ngaimi pawcawmnak rian cu Ar-inn, Thingthei dawr, le Sushi hna hi an si. Hi rian ruang ah kan dawtmi chungkhar, unau, hawikom, le khrihfabu chuahtaak in hmunkip ah kan kal. Kal lo dingin thlauhtu, le soiseltu an um lio ah, kal dingin forhtu le thazang petu zong an rak um ve.
Kan khrihfabu hi Farm Chin Baptist Church ti a si. Chin miphun dihlak kan i funtomnak buu Farm Chin Community zong an um. Kannih cu Southern Missouri, Springfield, MO area ah ummi kan si. Springfield le Arkansas he fonh in khrihfabu bu (5) kan um. Pastor (6) kan um i, CBCUSA he pehtlaihnak ngeimi bu kan si hna. Kan dihlak ah minung 1,000 hrawng kan si. Laimi nih US ah khua thar kan tlakmi hmunhma a si.Hawi he bia kaa ruah tawn. Biahalnak ka tuah tawnmi hna cu:
- 1. Zeiruangdah ar-inn nan cawk?
- 2. Farm um hi nan i nuam maw?
- 3. Nan cawkmi ar-inn hi nan i keih maw? tiah ka hal tawn.
Minung cu pakhat le pakhat kan ruahnak le kan dirhmun an i khah lo bantukin, an ka lehning zong aa khat ve lo. An i dang cio. Nain, a tam deuh sin in ka hmuhmi lehnak a tawinak in hrawmh kan duh hna.
1. Investment: Laimi nih ar-inn kan cawk tikah a miak in zuar tthan te dingin kan cawk. Tahchunhnak ah, ar-inn kan cawkmi hi company (Tyson, George’s, le Simmons) he contract tuah viar an si. A tam deuh cu kum 10, kum 15, kum 20 in contract tuah an si. Cu contract cu a biapi ngaingai. Zeicatiah, felfai tein ar-inn le nunnak ngeimi sattil zohkhenh lo ahcun company nih contract phih khawh a si. Contract phih ah cun ar pek ti lo khawh a si. Ar inn zong zuar tthan khawh ti lo a si.
2. Business. Laimi nih ar-inn kan cawk tikah long-term pawcawmnak business pakhat caah kan cawk. A million dih in tuahmi business an si caah income a ttha, a tam ve. Cucaah rumnak lam a fawi. Pawcawmnak a fawi. Kanmah dum le lo ah zalong tein kanmah rian te ttuan a si.
3. Fa le Zawnruahnak: Nu le pa cheukhat nih khuapi chung i kan fa le tthanter hi a rem ti deuh lo mi kan um. Khuapi chung ah cun kal umnak hmun a tam; nuamhnak a tam; vahvaihnak tam deuh caah fa le an i rawk sual lai, ti phang in farm ah tthialpimi an um.
4. Chungkhar Zawnruahnak: Khuapi chung ah nu le pa tam deuh cu company ah rian ttuan a si. Shift dangdang in ttuan a si fawn. Nu le va i hmuh/biaruah khawh lo caan a tam. Fa le he i hmuh lo caan le biaruah khawh lo caan a tam. Cucaah, farm ah cun chungkhar rual nuam tein kan tthudir kho lai, ti ruahchannak he kan cawk. An i ruahchan bantukin cheukhat chungkhar ah cun a tling taktak. Chungkhar tling tein thla an cam kho; an it kho; rawl an ei kho; breakfast, thaithawh, le zanriah an ei kho; pumhnak ah an kal kho; hmunkhat ah rian an ttuan kho; nu le pa nih an fa le sianginn ah an thlah, an don khawh hna. Khrihfabu program ah nu le pa nih an chiah/thlah khawh hna. Hi nun hi Laimi lawng si lo in, US minung nih ngeih an duh nain an ngeih khawh lo mi nun pakhat a si.
5. Farm Um Duhnak: Laimi nih ar-inn kan cawk tikah investment le business ruah ruangah si lem lo in farm um duh hrimhrim ah a cawmi zong kan um. Laimi cheukhat kan ratnak (background) cu farm he aa khat ngaimi a si. Farm cu khuate le khuadai a si. Mah inn le lo rian te ttuan a si. Mah dum chuak tisik-anhnah ei a si.
Sattil zuat khawh a si. Tahchunhnak ah, caw, vok, meheh, tuu, rang, le ngal tibantuk zuat khawh a si. An i manh caan ah tiva an kal. Sur an chep; ram an vai; ram an riak. Cu nih cun thinlung a nuamhter ngaingai. Kan kaltaakmi Laitlang lei bantukin tthutdir le nun a si caah ram tthatnak American nunning a thiam/tlai kho ve lo mi nu le pa caah cun a ttha ngai i, nu le pa zong an i nuam ngaingai. Mino ca’h balte cun a harnak tete an um ve. Ar-inn cawk kan itimh tikah:
- A. Fa ngeimi kan si ahcun pastor, khrihfabu, le community ttha tein a umnak le a tthawnnak hmun ah cawk khawh i zuam usih.
- B. Kan fa le sianginn kainak le siizung tthatnak hmun ah cawk khawh i zuam usih.
- C. Fel tein hlathlainak ngei hmasa hna usih. Ar-inn tuah hi zapi caah a si lo, ti philh lo ding. Ar-inn tuah lawng hi pawcawmnak rian a si lo, ti philh lo ding. Ar-inn cawkmi paoh a miak um lai tinak a si lo, ti philh lo ding. A hlawkmi le hlawk lo mi um khawh a si ve. D. Pastor le khrihfabu um lo nak hmun kan cawk ahcun chungkhar pumhnak, pumpak in Bible rel le thlacamnak, ti bantuk fel tein ngeih khawh i zuam hna usih.
Theihternak: Online catialnak lawng si caah tlamtlinlonak le chambaunak tampi a um lai. Atu ka ttialmi hi a tling thlu hrimhrim lo; a ttialtu keimah zong ka hngal thlu hrimhrim lo. Nain, siaherhnak he careltu caah tthathnemnak um hnga maw, tiah ka rak ttialmi a si. Credit: Van Neih Bik