Thantlang Kahdohnak Ah CNA Ralkap Sergeant Salai Ling Hung Nunnak A Liam. Nihin September 25 zinglei ah Chin ramkulh, Thantlang ah kahdohnak a chuak i, cu kahdohnak ah cun Chin ralkap CNA sergeant Salai Ling Hung nunnak a liam, tiah theih a si.Nihin Thantlang khuachung kahdohnak ah Hakha um SAC ralkap nih hriamngan in an bawmh hna pinah raltuknak vanlawng zong an thlah. TCP
Saṭil Zuva Ca Ah Falam Peng Parte Khua Mi Hna Nih Ruah Ti Khonnak Khor An Cawh. Chin ramkulh, Falam peng, Parte khua ah August 26 in Parte khuami nih an rak cawhmi ruah ti khonnak khor cu September 24 ah a dihlak in an lim cang, tiah Zalen nih a ṭial.Saṭil zuva nih ṭhal caan ah tlanh ding an ngeih khawh nakhnga Salai Aung Myint nih online ah mipi bawmhhalnak a rak tuah i, hleihlak bantuk muisam a ngeimi ruah ti khonnak khor cu khuami hna bawmhnak in an cawh khawh, tiah theih a si.Ruah ti khonnak khor a cotu hi Parte khua mi mino 30 leng an si i zarhteni fatin an cawh tawn. Thla khat chung ah an lim khawh, tiah Zalen nih cun a langhter.
“Zarhteni fatin te mino nih an cawh lengmang caah an lim. Cu pinah hi rian ṭuan chuah khawh a si nakhnga a tawlreltu Salai Aung Myint cung zong ah kan i lawm tuk. Ṭhal caan ah saṭil le zuva hna ca ah ti a har ti lai lo. Kum saupi ca ah thawpat le hai zong kan cin lai,” tiah khuami pakhat nih a chim. Ruah ti khonnak khor hi a thuh pe khat le cheu, a sau pe 100 a si i cheukhat khor cu pe 60, 50 tluk tiang an cawh. Khor a cawhmi dihlak hi khor 28 a si. Khor an cawhmi a vang hi pe 10, 30 tiang a kau, tiah Zalen nih a ṭial.