Tulio a buai taktak mi Israel le Hamas misual phu tapung hna i dohnak kong ah Hamas ralhrang phu a rak dirhtu pa i a fapa kum caan saupi Hamas ralhrang riantuannak ah a rak cawlcangh ve mi Mosab Hassan Yousef cu US hrambunh media ngan a si mi FOX News nih biahalnak an ngei i Hamas sining le an cawlcangning vialte vawleipi theih in a phuan dih cicek.
Mosab Hassan Yousef nih a chim mi chungin a biapi deuh mi pawl kan hun langhter lai.Mosab Hassan Yousef Cu tulio Israel hlonh dih a timhtu ralhrang phu Hamas a rak dirhtu Hassan Yousef fapa a si.A pa cu Hamas ralhrang dirhtu a si tikah a mah zong cu kum caan saupi Hamas cawlcanghnak a rak i telmi a thisen thap bak in Israel a rak dohtu a rak si ve.
Hamas ralhrang a tuan lio a liama cia 1996 lio ah Israel ralkap nih an rak tlaih i Israel thong ah rak thlak mi a si.Hamas ralhrang ah a rak um lio ahhin Hamas nih Israel minung cu chim lo Palestine minung tampi an thah hna i minung tuah in rak tuah an si lo nak vialte te Hamas nih Palestine mipi a ventu kan si tiah an aupi mi vilate hi lih a si.Hamas ralhrang hi Palestine mipi caah rian a tuanmi an si lo i Iran nih a zuat mi Iran caah rian a tuanmi ralhrang phu an si nak vialte cu vawllei pi theih in a chim dih hi a si.
Hamas ralhrang chungah kumkhat le cheu ka cawlcangh hnu ah Palestine mipi Hamas ralhrang nih an thah ning hna le minung phaw caah ralram ah an hmanmi hna ka hmuh tikah Hamas ralhrang chungah um rih dingin ka ruat kho lo caah ka rak chuak tak mi ralhrang phu an si tiah a chim chih.An i timh mi lak a ngan bik mi cu Israel mipi thah dih hrawh dih cicek hi a si a ti.Cucu Iran ram zong nih a timh mi a si caah Iran ram nih Hamas ralhrang pawl cu hriamnam in siseh tangka in tampi a rak bawmhnak kong zong a chim chih fawn.
Hamas ralhrang ka chuah tak hnu kum 25 a rau hnu ah Hamas ralhrang pawl nih an i timh mi pakhat Palestine mipi uk khawhnak ding caan tha cu an hun hmuh taktakk i Gaza ah um mi hna Palestine mipi cu an uk hna i an cawlcangh ning cu nan hmuh bantuk in a si ko.Israel mipi an thah mi hna lawng si loin Palestine mipi Gaza ah a um mi hna thong tampi an thah cang hna.Cucu Palestine mipi ventu kan si an ti mi cu lih a si tiah a chim diam ai.
Fox News nih Mosab Hassan Yousef cu a tu lio Israel nih Gaza a tuk mi cungah zeidah chim na duh na hmuh tiah an hal tikah a leh mi hna cu hi thil hi Israel nih a tuah hmasa mi a si lo Hamas ralhrang nih a tuah hmasami a si caah mipi an himnak ding caah mipi ventu an si bantukin Israel nih Hamas a lehrulh mi hna an si Israel an palh nak pakhat hmanh a um lo tiah a chim.Ram tampi nih Israel an mawtchiat ko lai nain an mipi a himnak dingcaah a tuah awk a simi a tuah mi a si tiah a chim chap.
Gaza ah a um mi hna mipi million tampi hna an intuar nak cungah a hmuh ning a langhter chih mi cu Gaza hi Chaklei le thlang lei tiin a um i chak lei hi Hamas ralhrang pawl nih vawlei khor tampi cawhin hmun an khurnak hmun le Israel hrawh an timhnak hmunpi a si bantuk in an umnak hmunpi vialte hrawh dih hnu le Hamas ralhrang an cihmih dih hnu lawngah million in a um mi hna Palestine mipi nih himnak an hmuh khawh lai tiah a chim.
Tulio ah Gaza chungah a ummi hna nih bawmhnak zeihmanh an hmuh lo i bawmhnak a luh khawhnak ding caah zeitindah na ruat tiah an hal tikah a leh mi hna cu Gaza mipi nih vawlei cung ram tampi in bawmhnak tlamtling an hmuh khawhnak ding ca ahcun Gaza chungah nawlngeitu hna thlennawn hrimhrim a herh.Cucu Igypt nih maw Arab ram hruaitu hna nih maw a dangdang pakhatkhat nih Gaza hi an tawlrel ta lo ahcun bawmhnak a lut zong Gaza mipi hna caah saltaihnak pakhat hmanh a um lai lo tiah a chim hi a si.
Tulio buainak ahhin Hamas nih Palestine ram caah an khel a si maw tiah an hal than tikah khel nemmam hlah.Hamas cu Palestine ram caah a cawlcangh mi an si hrimhrim lo.Palestine vawlei hmangin Iran le Russia duh mi a tlin khawhnak ding caah a cawlcang mi an si.Hamas nih Palestine mipi caah an khel mi a si lo tiah a chim chih.