Myanmar ram chung Sagaing Ramthen chungah a um mi Myanmar ram chaklei kap Kawlin khuapi cu Mipi ralkap hna nih November 05 zanlei suimilam paruk hrawng ah ralhrang hna kut in an lak khawh cang tiah Kawlin mipi hna sin in thawng theih a si.Kawlin khuapi lak ding ah Mipi ralkap hna i bawmin November 03 thawk in biatak tein an luh hnawh hna i an kah hna.
Asinain Min Aung Hlaing ralhrang rual nih cunglei vanlawng in hecheh tiah an bawmh ve hna caah fawi tein an la kho lo nain November 05 zanlei suimilam 06 PM hrawng ahcun ralhrang pawl cu an hriam chiah in mipi ralkap sinah a up mi an um i,cheukhat cu a zammi hna zong an um hna tiah an chim.Kawllin khuapi palik zung le pengkomh zung vialte cu mipi ralkap nih an lak khawh dih cang tiah thawng theih a si.
Kawlin khuapi chung thonginn ah ralhrang nih an hremmi hna thongtla zeimawzat zong mipi ralkap hna nih an khamh hna i an chuahpi khawh dih cang hna tiah an langhter chih.Kawlin khuapi lak khawh ding caah mipi ralkap pawl tanrual hna nih biatak tein an phomh hna hnu ah nithum hnu ah an lak hi a si.Kawllin khuapi laknak ah aa tel mi hna mipi ralkap hna cu PDF le ပကဖ hna an si.
Kawlin khuapi cu Mandaly le Kachin khuapi Myikyina petlaihnak lampi cung Thicaih khuapi in meng 40 a hlatnak hmun ah a um mi khuapi pakhat a si.Hi khuapi hi mipi ralkap pawl hna caah a biapi taktak mi hmun le hma a si caah a tubantuk in Mipi ralkap nih an lak khawh hi Min Aung Hlaing ralhrang pawl caah ahcun mangchia taktak a si cang.