East Lairam i Kahnak Ah Champhai Sii-Inn Ah Minung 21 An Phan I Minung 5 Aizawl Ah Lanhpi An Si. Central Lairam, Lawngtlai 2023 Sikpar 13: East Lairam Falam peng Rihkhuadar ralhraang riahbuk cu nizaan khan CNA, CDF Hualngoram, CDF Thantlang le hriamtlai phu komh nih an kah hna i nihin tiang kahdohnak aa pehtlai peng, Kahdohnak ah ralhraang nih Jet Fighter in Khuamawi ah bomb an thlak. I kahnak ruangah Khuamawi khuami hna cu Mizoram Zokhuathar lei ah an zaam hna, meithal kuan hi Mizoram zong ah a lut ngaingai.
Champhai DC Pu James Lalrinchhana nih East Lairam i kahnak ah thinphang thlalau in Champhai District chung Bulfekzawl le Zokhuathar ah a rak zaammi an i chap chin, ralzaam in a rak lutmi hna hi minung zeizat an si hngalhfian a si rih lo tiah a chim. I kah hi Mizoram he aa naih ngai caah Phaikuam i ummi hna cu nithaizing khan an i thial. A rak lut tharmi hna bawmhchanhnak caah hin District Disaster Management Authority hna nih rawl le meh i ken in Zokhuathar lei an panh tiah a chim.
Mizapi hliamtuarmi hna hi Champhai District Hospital ah phurh an si hna, hi thawngpang țial tiang ahhin minung 21 Champhai sii-inn ah phanhpi an si cang. An lak ah minung 5 cu Aizawl ah refer an si, Hliamtuar mi lak ah pahnih hi Zohkhuathar ummi an si. A dang cu East Laimi lawng te an si. An lak ah minung 3 cu an dirhmun a chia ngai tiah District Hospital rianțuantu hna nih an chim. TLT