Rih Le Ṭio(Khuamawi) SAC Sakhan Cu Chin Ralkap Ṭangṭi Phu Nih An Laak. Rih SAC sakhan le Khuamawi SAC sakhan cu nizan November 12 zanlei suimilam 4 hrawng in Chin ralkap ṭangṭi phu nih an kah i, Rih le Ṭio sakhan cu an laak khawh cang, tiah thawngpang kan laknak nih a chim. SAC ralkap kahmi RPG kuan nih Zokhuathar ah aa dor mi ralzam pahnih; tarnu pakhat le pa ngakchia kum 12 mi cu an ban ah a hliamh hna i, an pahnih in Champhai sizung ah zohkhenh an si.
Kahdohnak ruangah kaphnih in thi le hliam an um le um lo thawng fiang theih khawh a si rih lo. Chin ralkap lei nih hin SAC sakhan an kah lai kong hi an rak thanh cia cang hna ruangah tualchung mi zeizawzat cu Mizoram lei ah an zaam hna i, nizan tiang ah Myanmar lei in ralzam thongkhat leng Zokhuathar ah an lut tiah Zokhuathar YMA President nih a chim.
MNDAA Nih Kunlone Khuapi Dihlak An Lak Khawh. Shan ram chaklei Kunlone khuapi SAC sakhan ngan, khah-mah-yiah 312 battalion le palik sakhan telh in Kunlone khuapi dihlak cu MNDAA nih November 12 ah an lak khawh cang. Hriamngan le hriamhme an lak mi a tam. Hriamnam an lak mi ah a tom in kah mi missile le tank zong an i tel. A dang hriamnam an lak mi zong a tam taktak.November 12 thiamthiam ah TNLA nih Shan ram chaklei Tibaw peng SAC sakhan pahnih an lak ve. Hriamtlai unau thum hna nih Shan ram chaklei cu an lak chin lengmang caah SAC nih Shan ram chaklei peng 8 cu ralkap uknak (Martial Law) a thanh. TCP