Rih Khuadar Ralhraang Sakhaan Pakhat Laak A Si I Ranhraang 5 A Nung In An Tlaih Hna. India-Myanmar ramri Chin ramkulh Falam peng chung a um mi Rih Khuadar ralhraang sakhaan cu Nihin November 13 zinglei sang ah an laak tiah CNA nih an feh ter. Rih Khuadar sakhaan cu nizan November 12 zaan slm 11:00 tluk khan ithok in kahdoh hram an thok i tuzing slm 5:00 tluk ah kan laak khawh tiah CNA in Salai Htet Ni nih Myanmar Now ah a chim.
CNA, CDF-Hualngoram le CDF-Thantlang Drone Team hna nih Tio tiva pawng um ralhraang hna sakhaan fa deuh mi pakhat zong an nam cuahmah tiah theih a si. “Rih khuadar Tlang cung ah a ummi ralhraang hna sakhaan lianmi kan laak hmasa i a thi le hliam an um hna,hriam zong zei mawzat kan laak leng ah a nung in minung 5 kan tlaih hna,a thi le hliam le hriam laak zat bal a fiang rih lo.
A tu ah tio tiva kap ramri lampi cung um mi ralhraang sakhaan nam cuahmah lio ah ralhraang hna jet fighter a ra i cu hnu ah thawng fiang kan thei kho ve rih lo” tiah CNA in chim phuan nak nawl ngei Salai Htet Ni nih tu chun chun ah khan Myanmar Now ah a chim hi a si. Chin ram chung ah cun vulei lei bawmtu ralkap thlah ding ah an i harh ngai lai,hmun an khuar nak khua khat le khua khat kar cu kan mah nih hmun kan laak viar fawn caah van lei deuh in kan a rak bawmh hna lai tiah ka ruahdomh ti in Salai Htet Ni nih a chimchap. CBN
SAC Ralkap Meithal Kahnak In Zokhuathar Ah Aa Dormi Ralzam Pakhat Nunnak A Liam! Rih SAC sakhan cu Chin ralkap ṭangṭi phu nih an laak cang hnu ah Ṭio sakhan cu Chin ralkap nih an nam ṭhan i, SAC lei nih kahthlor in Zokhuathar lei an kah ruangah ralzam in aa dormi pa kum 51 mi cu meithal kuan chawkvai nih a khen i a nunnak a liam.
Tuzing ṭhiamṭhiam ah Zokhuathar ah ralzam in aa dormi tarnu pakhat le ngakchia pa pakhat cu meithal kuan hliam an pu cang. SAC lei nih hin Ṭio sakhan SAC ralkap hna bawm ding in raltuknak vanlawng a thlah i, vanlawng nih khuachung zong a kah tiah tualchung mi hna nih an chim.Vanlawng kahnak kong he pehtlai in thawngpang hlat cuahmah lio a si. Kahdohnak ah kaphnih in thi le hliam kong ah thawngfiang theih a si lo.(Kan ca a reltu lakah Zokhuathar a ummi kan um ahcun comment le messenger in thawng thanh khawh peng kan si) TCP