Tibual Sakhan In SAC Ralkap 29 Mizoram Lei Ah An Zaam Ṭhan! CNDF nih Tibual SAC Sakhan an laak hnu in SAC ralkap 29 cu Mizoram lei ah an lut ṭhan, tiah All India Radio News nih a ṭial. SAC ralkap 29 hna nih hin Assam rifle kut ah i pek an i tim, tiah an chim. Dungtlang Police station in a chuakmi Mizoram palik nih SAC ralkap pawl hi Saikhumphai pawngah va don i, Assam rifle sinah ap ding in timhlamhnak an ngei. SAC ralkap 29 dong ding in Mizoram Palik, Assam rifle, YMA le Vaphai VC hna cu Saikhumphai lei ah an kal, tiah AIR nih a ṭial.
Tibual kahdohnak ruangah tualchung mi 600 hrawng cu Mizoram lei ah an zaam i, ralzaam hi an karh lai tiah an zumh kong Vaphai khuatlang hruaitu nih an chim. Kan rak theih cang bantuk in Rih le Ṭiau sakhan in a zaam mi SAC ralkap 43 cu Mizoram ah lut in Assam rifle sin ah an rak i pe i, Myanmar lei ah Indian Air Force helicopter in phorh an rak si cang.
Falam Peng Var Khua Ah A Ummi SAC Ralkap Pawl Nih An Sakhan An Chuahtak. Chin ramkulh, Falam peng Var khua ah a ummi SAC ralkap pawl cu nihin November 15, zanlei suimilam 1 hrawng ah an sakhan chuahtak in Falam khuachung Khah-Lah-Yah 268 sin ah an i fonh dih, tiah tualchung mi nih an chim.”Tuchun ah SAC ralkap pawl nih an sakhan cu an chuahtak i Forland motor 2 he Falam khua ah an kai dih. Atu hrawng cu Chin ralkap nih pehtlai in sakhan an laak khawh caah an thin a phang i an chuahtaknak a si lai” tiah Var sakhan pawng ummi pakhat nih The Rihli Voice ah a chim.
Falam peng chung ah SAC ralkap sakhan 5 a um i Chin ralkap nih 3 an laak cang, Var sakhan laak ṭhan lai phan ah an chuahtaknak a si lai, tiah zumh a si. A liamcia April 10 lioah Var sakhan cu CNDF nih an rak kah i SAC ralkap 11 an thi, minung 14 an rak tlaih hna. Cu sakhan kahdohnak ah cun hriamnam zeimawzat zong an rak laak khawh.Hmanthlak : A liamcia April 10 lio CNDF nih hriamnam an rak laakmi.TCP