Chin STAR tuahnak ah midang bawmhnak phaisa fangkhat hmanh ka cohlang lo, tuhnu zong cohlan kai tim lo. Khua Uk Lian nih Chin STAR kong a chimmi ah nan lau tuk cio lai, tet-te a langhter lo nain upa pakhat bia asi caah tampi nih nan zumh khi nan mawh bak lo. Nain, Chin STAR cu Pathian dawtnak thawng in aho bawmhnak zong kan hal lo i kan cohlang lo, keimah pumpak phaisa in 100% tuanvo ka lakmi a si.
#Ramtha um Lai mirum tampi nih ‘kan in bawmh ve lai’ an ka ti hmanh ah ka rak cohlang hna lo, Chin STAR kan kalpi ning ah an i thlak ding le an kan control ding ka duh bak lo caah a si.Season (2) zong hmaikum June thla ah kan thawk than lai. Keimah pumpak phaisa in 100% tuanvo ka lak than te fawn lai. Pathian nih aka dawt i Chin STAR hi cu midang bawmhnak hal loin ka thih tiang a tuah kho ding dirhmun ah aka chiah ko.
Zungzal in keimah minchiatnak a chuahpi ding thil khi phaisa ting thongkhat hnih ngah duh ruang men ah ka tuah duh lai lo, a fim komi nih nan tuah duh cio lai lo. Cu nak tam deuh phaisa zong cu Pathian thawng in ka ngei ko fawn. Khua Uk Lian kha comment biahalnak a lehmi khi asi, timtuahnak ngeih ciammam in a chimmi a si lo. ‘An ngol a hau, an ngol lo ahcun…’ tiah a chim chih. Cu a bia cu ngaih tikah Chin STAR kong research a tuah bak lo, kan dih cang timi hmanh a thei lo timi a fiang. Kan dih cang timi hmanh theih loin kan konglam thuk deuh a theih ding khi sullam a um lo.
Pu Khua Uk Lian sin nawlnak: Kan ram ah upadi a nung ti lo nain mizei poah hi chungkhat unau, khuami le penglang tiin khua kan sa dih. A dik lomi bia in mi pakhat thlak kan timh tikah i thehthiam lonak tampi a chuak kho. Na chimmi a dik i tet-te na ngei ko ahcun zapi sin ah rak langhter hram ko. Cuti na langhter khawh lo ahcun ‘ka chim palh’ tiah theihter nak na rak tuah nak hnga zaangfah kan nawl. Tet-te um loin ‘Khua Uk Lian nih Zophei CDF phaisa rupee ting 20 a fir’ ti ninglaw na duh ve hnga lo. Chim khawhnak hmur ngei ruang men ah zei evidence hmanh um loin duhmi poah chim le midang sual puh awk a tha hnga lo.
Mipi sin theihter nak: Kei hi a phun kip doh ka tong zungzal, hmailei zong ka tong rih lai. Zumh ding le zumh lo ding cuai thlai hmasa hram u tiah nawl kan duh hna. Kei nih cun ka ti khawh tawk in miphun thancho nak ding caah ka phaisa hman ding lawng kai tim, zeitik hmanh ah miphun leirawi in phaisa ngah kai tim bal lo, hmailei zong kai tim lai lo timi zong theihter kan duh ko hna.