Nizan ah PDF Zoland nih Tidim peng Kennedy tlang i SẮC sakhan cu an lak khawh tiah Tidim khuapi a um mi pakhat nih The Chin Post ah a chim. An lak ningcang, a thi le hliamtuar, hriamnam lak mi tibantuk cu tlamtling deuh in taar khawh kan i zuam than lai.
Kalaymyo, Tahan Ah SAC Ralkap Le Tualchung Ralkap Ṭangṭi Phu Kar Kahdohnak A Chuak. Sagaing ramṭhen, Kalaymyo Tahan sang thlan hmun pawng ah umhmun a khuarmi SAC ralkap cu CDF KKG le ṭangṭi phu nih an kah hna, tiah theih a si. “Zahan November 20 zan in SAC ralkap pawl cu kan kah hna i nihin November 21 zinglei tiang kan kah hna. Cu kahdohnak ah PDF ralkap pakhat nih ram le miphun ca ah a nunnak a pek. A ruak zong ṭha tein ralhmai a kalmi hna nih an fimhlawm i, hnu an kir cang hna,” tiah CDF KKG in ṭuanvo ngeitu pakhat nih The Chin Post ah a chim.
Tahan thlan hmun pawng ah umhmun a khuarmi SAC ralkap kahdohnak ah SAC ralkap lei in a thimi le aa hliammi an um le um lo a fiang rih lo. Kan ralkap hna hnu an kir lio a si caah fiang tein thawngpang theih khawh a si rih lo, tiah a chim chap.Kalaymyo um SAC ralkap nih hriamngan an kah tuk caah Letpanchaung khua lei zong ah a va tla. Letpanchaung khua tu ahcun kahdohnak a chuak lo. CDF KKG le ṭangṭi phu nih SAC ralkap sakhan cheukhat zong kan kah cuahmah lio a si, tiah CDF KKG in ṭuanvo ngeitu pakhat nih cun The Chin Post ah a chim.
Nihin November 21 ah PDF Zoland nih Tedim ram chung um Kennedy tlang SAC ralkap sakhan pakhat zong an laak tiin thawng theih a si. Mi cheukhat nih zahan November 20 ah an laak cang. Sakhan an laak lioah SAC ralkap pawl cu an um ti lo tiin a chimmi zong an um. Hi kong ah The Chin Post nih fehternak kan tuahmi a um rih lo i thil sining kan hlathlai cuahmah.