AA nih Ralhrang Tilawng 2 An Lak Piak Hna

Rakhine Ramkulh SAC Ralkap Tilawng Pahnih Cu AA Nih An Laak I An I Kalpi. Rakhine ramkulh, Kyauktaw peng in Chin ramkulh Paletwa lei ah a kal tawnmi SAC ralkap tilawng pahnih cu Rakhine ralkap AA nih an laak khawh, tiah Rakhine hrambunh DMG thawngzamhnak nih an thanh. SAC ralkap tilawng pahnih cu Kyauktaw khuapi tiva kam an dir lioah AA ralkap nih an laak i Kaladan tiva lei ah an i kalpi, tiah an chim.

Hi thil cangmi kong he pehtlai in SAC chimnak nawlngei Zaw Min Thun zong nih a dik ko tiah fehter in a chim, tiah DMG nih cun an langhter. SAC ralkap le AA ralkap cu Rakine ramkulh chung ah i kap ti lo ding in kaphnih kar kahdaih hnatlaknak an rak ngei nain a luancia 2023 November 13 thawk in an i kap ṭhan i SAC ralkap nih hriamngan le hriamhme he kahdohnak an tuah hlei ah tilawng le vanlawng hmang zong in kahdohnak fak an tuah tawn, tiah theih a si.

Falam Peng, Tuphei Sakhan Cu SAC Ralkap Nih An Chuahtaak. Chin ramkulh, Falam peng Tuphei sakhan um SAC ralkap pawl nih an sakhan an chuahtaak caah khualtlawng mi hna zong ralphaw hman dingin an tlaih khawhmi hna a si. Cucaah Falam-Kalay lam cu hman rih lo ding le zulh rih lo dingin CNO nih nihin November 22 ah lakhruak in thanhnak an tuah.

November a zarhhnihnak ah Falam peng um SAC ralkap sakhan cheukhat cu CNA le CNDF nih an laak hnu in Falam peng um SAC ralkap cheukhat zong ralkap nih an chuahtaak cang. Chin ralkap nih Rih le Ṭiau sakhan an laak i, Tibual le Var sakhan cu SAC ralkap nih an chuahtak hnu in Tuphei sakhan um SAC ralkap nih an sakhan cu an chuahtaak ṭhan.TCP

Leave a Comment